2026 жылғы 17 сәуірде Әл-Фараби атындағы Қазақ ұлттық университеті кітапханасында «Mansap+» бос жұмыс орындары жәрмеңкесі табысты өтті. Іс-шара студенттердің кәсіби бағдарлануына және түлектерді жұмысқа орналастыруға ықпал ететін тиімді алаңға айналды.
Жәрмеңкеге әртүрлі салалардағы жетекші жұмыс берушілер қатысып, өздерінің бос жұмыс орындарын, тағылымдамадан өту мүмкіндіктерін және мансаптық даму бағдарламаларын ұсынды. Олардың қатарында география және табиғатты пайдалану факультетінің метеорология және гидрология кафедрасының стратегиялық серіктесі — Қазаэронавигация ерекше белсенділік танытты. Кәсіпорын өкілдері азаматтық авиацияны қамтамасыз ету үшін қажет метеорологтар мен синоптиктерге деген сұраныс, мамандарға қойылатын талаптар, сондай-ақ аэронавигация саласындағы мансаптық өсу мүмкіндіктері туралы жан-жақты ақпарат берді. Сонымен қатар кеңестер өткізіліп, үміткерлерді бастапқы іріктеу жүргізілді.
Іс-шара барысында қатысушылар жұмыс берушілермен тікелей байланыс орнатып, еңбек нарығының өзекті талаптарымен танысып, жұмысқа орналасу бойынша практикалық ұсыныстар алды. Бұл түлектердің кәсіби ортаға сәтті бейімделуіне ықпал етеді.
Жәрмеңке Біріккен Ұлттар Ұйымы айқындаған Тұрақты даму мақсаттарына сәйкес ұйымдастырылды, атап айтқанда:
— 4-мақсат — Сапалы білім;
— 8-мақсат — Лайықты жұмыс және экономикалық өсу;
— 17-мақсат — Әріптестік мақсаттар.
«Mansap+» жәрмеңкесі университет пен жұмыс берушілер арасындағы ынтымақтастықты нығайтатын және студенттер мен түлектердің кәсіби дамуына жаңа мүмкіндіктер ашатын маңызды алаң екенін тағы бір мәрте дәлелдеді.
Басқа жаңалықтар
