«Техногенді бүлінген экожүйелер: топырақ-ботаникалық аспектілері және қалпына келтіру жолдары» тақырыбында дөңгелек үстел өтті

2026 жылғы 22 сәуірле ботаника және агроэкология кафедрасының ұйымдастыруымен «Техногенді бүлінген экожүйелер: топырақ-ботаникалық аспектілері және қалпына келтіру жолдары» тақырыбында дөңгелек үстел форматында танымдық-ғылыми іс-шара өткізілді.

Іс-шараны Құлымбет Қ.Қ. – PhD, ботаника және агроэкология кафедрасының аға оқытушысы және Тастанбекова А.А. – ботаника және агроэкология кафедрасының оқытушысы жүргізді.

Дөңгелек үстел барысында қатысушылар техногендік әсер нәтижесінде бүлінген экожүйелердің қазіргі жағдайын, олардың топырақ жамылғысына және өсімдіктер қауымдастығына тигізетін ықпалын талқылады. Сонымен қатар өндірістік және антропогендік факторлардың салдарынан өзгеріске ұшыраған аумақтарды қалпына келтірудің ғылыми негіздері, топырақ құнарлылығын арттыру, өсімдік жамылғысын қайта қалыптастыру және биологиялық әртүрлілікті сақтау мәселелері қарастырылды.

Қатысушылар техногенді бүлінген жерлерді қалпына келтіруде топырақ-ботаникалық зерттеулердің маңыздылығына ерекше назар аударды. Атап айтқанда, топырақтың физикалық-химиялық қасиеттерін анықтау, өсімдік түрлерінің құрамын бағалау, табиғи қалпына келу үдерістерін бақылау және рекультивациялық шараларды дұрыс жоспарлау мәселелері кеңінен талқыланды.

Іс-шара Тұрақты даму мақсаттарының 15-мақсатына сәйкес ұйымдастырылды. Аталған мақсат құрлық экожүйелерін қорғау, қалпына келтіру және оларды ұтымды пайдалануға жәрдемдесу, ормандарды ұтымды басқару, шөлейттенуге қарсы күрес, жердің деградация процесін тоқтату және кері қайтару, сондай-ақ биологиялық әртүрліліктің жоғалуын болдырмауға бағытталған.

Дөңгелек үстел соңында қатысушылар техногенді бүлінген экожүйелерді қалпына келтіру қазіргі экология, топырақтану, ботаника және агроэкология салалары үшін өзекті ғылыми әрі практикалық бағыттардың бірі екенін атап өтті. Мұндай іс-шаралар экологиялық білімді арттыруға, табиғи ресурстарды ұтымды пайдалануға және қоршаған ортаны қорғау мәдениетін қалыптастыруға ықпал етеді.

Ботаника және агроэкология кафедрасы